by अमर शहीद देवपाल सिंह देवल रौ सुजस ~ हिम्मत सिह उज्जवल “भारोडी”
अरि फोजां अकुलायगी,
हुई गजब हलचल्ल।
भीम रूप मे जो भिड्यो,
देवपाल देवल्ल ।।
अंग भंग व्है पाक रो,
बणग्यो न्यारो बंग।।
देवपाल री छवि देखने,
दल दुसम्यां रौ दंग।।
कलम संग करवाल भी,
चारण चित भरपूर।
देवपाल एहडो लड्यो,
सांची कर दी सूर।।
देवपाल बलिदान व्यो,
राष्ट्र धरम री राह।
जो सूरा रे गल सज्यो,
वीरचक्र ने वाह।।
धन्य वासनी री धरा,
रंग है राजस्थान।
धन्य शहीदां रं सुजस,
जय हो हिन्दुस्तान।।
~~हिम्मत सिह उज्जवल “भारोडी”