बैश कीमती बोट – कवि मोहनसिंह रतनू (चौपासनी)

आगामी दिनो मे पंचायत चुनाव होने जा रहे हैं, मतदान किसको करना हे इसके लिए कवि ने एक गाइडलाइन बनाई है। शांत सम्यक भाव से सही निष्पक्ष स्वंतत्र होकर मतदान करें।

दिल मे चिंता देश री,मनमे हिंद मठोठ।
भारत री सोचे भली,बी ने दीजो बोट।।

कुटलाई जी मे करै,खल जिण रे दिल खोट।
नह दीजो बी निलज ने,बडो कीमती बोट।।

काला कपटी कूडछा,ठाला अनपढ ठोठ।
घर भर वाला क्रतघणी,भूल न दीजो बोट।।

बुध हीणा गत बायरा,पाप उठावै पोट।
बिस कटुता री विसतरै, भूल न दीजो बोट।।

आयो घर आदर करे,सादर करे सपोट।
मोहन कहे बी मिनख ने,बैशक दीजो बोट।।

सर्व धरम सद भावना,सब जण लेय परोट।
हिलमिल चालै हेत सूं, बढचढ दैणा बोट।।

करडाई अडचन करे,सागै रखणो सोट।
निरभय,निडर,निसंक हो, बैशक दैणा बोट।।

पांच बरस बित्यो पछै,आयो पर्व अबोट।
चित्त उजवल नह चूकणो, बणठण दीजो बोट।।

जांत पांत नह जोवणी,नह बिकणो ले नोट।
भासा रे खातिर भिडै,बी नै दीजो बोट।

इण अवसर दारु अमल,हिलणो नी धर होठ।
जगां जगां नी, जीमणो,दैख चीकणां रोट।।

दशा बिगाडै दैश री,कर हिंसा विस्फोट।
दुस्ट विरोधी देश रा,कदैन दैणा बोट।।

प्रात काल न्हायो पछै,हरिसुमरण कर होठ।
दैणो बटन दबाय कर, बैश कीमती बोट।।

अंतस तणी अवाज सुण, सुध हदृय मन मोट।
बहु विध सोच बिचार कर,बढ चढ दीजो बोट।।

आगामी लोक तंत्रके पर्व मे अपने अमूल्य मताधिकार का प्रयोग अवश्य करे

~मोहन सिंह रतनू,
से.नि आर.पी.ऐस, बाल समंद रोड, जोधपुर