हेप्पी हैप्पी हुवै दिवाली, हैप्पी हैप्पी हुवै दिवाली- मोहनसिह रतनू,

हेप्पी हैप्पी हुवै दिवाली, हैप्पी हैप्पी हुवै दिवाली,
चमचम करती किसमत चमकै, चमकै गगन मुलकता तारा।
घर घर हो दिवलै री ज्योति, घर घर मे होवे पो बारा।
घर घर मे खुशियो ले घूमर, नाचै गावै दै दै ताली।
घर घर मे लिछमी लै बासो, भरै तिजौरी बीस भुजाली।
घर घर मे गूंजै किलकारी, घर घर बाजै मंगल थाली।
हैप्पी हैप्पी हुवै दिवाली, हैप्पी हुवै दिवाली…1

सीमा पर डटियोडा सैनिक, खैतां मे मैहनत कस करसा।
हाटां मे बैठा व्योपारी, हवैली हंसता कुंवरसा।
सगला ही झूलो सुख सैजा, सगला ही रहजो खुशहाली।
पूनम रहे कटे दुख पीडा, कटुता मिटै अमावस काली।
भारत मां री मातृ भोम पर, गूंजै जयहिंद गौरवशाली
हैप्पी हैप्पी हुवै दिवाली, हैप्पी हुवै दिवाली…2

आवै द्वार लेय उर आसा, जावै नही बिलखतो खाली।
अंतर तम फैले उजियारो, कदे न निकसै मुख सु गाली।
जीवन सरस उमंगतो जौबन, लगी रहे पिंड पर लाली।
प्रसन्न चित्त राखै परमेश्वर, छाया सिर राखै छत्राली।
दैस विदैसा बाजै डंका, रहो निसंका निरभयशाली।
हेप्पी हैप्पी हुवै दिवाली, हैप्पी हैप्पी हुवै दिवाली…3

बाजै मधुर प्रेम री बंशी, मारै मोज बैठी घरवाली।
बरसै सदा आनंद रा बादल, धीणो दैवै मात धजाली।
नदियां बहे खलकता नाला, खैतां मे छावै हरियाली।
फटै नही बम्ब हथगोला, धरती नह दीसै धूंआली।
मोहन करे ईश्वर सूं मन्नत, सुखी रखे मां शेरावाली।
हैप्पी हैप्पी हुवै दिवाली, हैप्पी हैप्पी हुवै दिवाली…4

रचियता- मोहनसिह रतनू, आर.पी.एस,से.नि., मां भगवती नगर बाल समंद रोड जोधपुर।