शिखर सगत बेठत सधर, अधर सिंघासण अम्ब– भवरदानजी माड़वा (कवि मधुकर

शिखर सगत बेठत सधर ,
अधर सिंघासण अम्ब ।
धजर फरहर मरूधरा ,
भमर समर भुजलम्ब ।
अमर करत आराधना ,
नमर सगत नवलाख ।
चमर ढुलत करनल चरण ,
भमर भगत जस भाख ।
उठत भजत दिन उगंतां ,
दिनकर शुभकर दाख ।
सुधर भवस मधुकर सकव ,
अमर अखर गुण आख ।
रटत भगत शीव रमणी ,
वँदत नमत भुज वीस ।
उधरत नर मधुकर अवस ,
जपत जिका जगदीस ।
चढ बबर उभी चारणी ,
मढ देशांणै माय ।
अढ रखण मधुकर इला ,
गढ मरुधर गिरराय ।🙏🏻🙏🏻🚩